臨近新春，除咗又係逗利市時間，亦係食盆菜嘅時間。大大隻鮑魚大大隻蝦，同埋濃香南乳嘅豬肉，再加吸盡肉汁精華嘅蘿蔔，一個盆，三五親朋好友，為開心嘅新年開個靚頭。不過，市面盤菜咁多，點揀好？
正宗風味盆菜 發哥擺大壽都搵佢
想食傳統正宗盆菜，元朗區就係你必然嘅選擇，而必然中嘅必然就係「屏山傳統盆菜」。呢間其貌不揚嘅舖頭仔，有乜咁巴閉先？一言以敝之：「民間特首」周潤發前年擺60大壽時，都係揀佢，咁你仲有咩理由拒絕呢？唯一嘅理由，只係你訂唔到 (記住要早啲訂定先)。
咁唔好彩你真係訂唔到屏山傳統盆菜，大歡喜筵席盆菜、萬里緣盆菜專門店，亦都係傳統盆菜嘅好選擇。
慳錢精明眼 市區盆菜點揀好？
若果打算簡單點，唔想入到元朗，隨便搵間酒樓聚一聚腳，想慳啲又想啱自己口味，就可以試下四大集團酒樓既盆菜。
原居民教你揀外賣盆菜
再hea啲，再隨便啲，買個外賣盆菜返屋企食，咁又點揀好呢？有傳媒就搵咗原居民兼時裝設計師鄧達智、劉健威試食太興、大家樂、大快活同美心嘅盆菜，結論係雖然大家樂味道好少少，但因為賣相欠佳，最後兩個都揀咗太興嘅鮑魚海味豐盛盆菜。
4款新式盆菜你又食過味？
時代變盆菜都喺度變，若果年年都食傳統盆菜，今年想有啲新意，不妨試試新口味，例如海鮮盆菜、素盆菜、泰式冬蔭功盆菜或者麻辣盆菜啦。
消滯小貼士
消化不良，可能係新年最容易出現嘅身體毛病，成年最有口福嘅時間食滯咗，梗係可惜啦。有營養師建議，脫脂奶、菠蘿、木瓜、薑茶、洋甘菊茶等都會有幫助。
關於作者
